NOSTRADAMUS (1503-1566)

PARASHIKUESIT ME TË MËDHENJË BOTËROR  


NOSTRADAMUS (1503-1566)


"Nostradamus" është emri i latinizuar i Michel de Nostredame, doktor dhe astrolog francez që jetoi nga 1503 deri 1566 dhe që u bë një nga profetët më të mëdhenj që ka njohur bota. Nostradamus lindi në St. Remy në Francë në 13 dhjetor 1503 nga prindër të pasur.
Thuhet se të dy gjyshërit e tij kanë qenë parashikues, ndonëse jo aq sa do të bëhej nipi i tyre. Gjyshërit e Nostradamusit kishin parashikuar ngjarje nëpërmjet vizioneve që kishin patur. Të dy ishin astrologë të mirë dhe pikërisht prej tyre Nostradamus mësoi astrologji.
Në moshën 21 vjeç, Nostradamus filloi studimet në mjekësi, në universitetin Montpelier, në Francën jugore. Ishte student i mirë dhe punonte shumë, por iu desh t'i ndërpriste studimet dy vjet më vonë për shkak të Murtajës së Zezë që vrau njerëz të panumërt në Francë dhe në Evropë.
Nostradamus la studimet dhe filloi të kurojë njerëzit e prekur nga epidemia. Me këtë ai fitoi respekt të madh në rrethet mjekësore dhe kudo. Nostradamus u bë një katolik i zjarrtë.
Prandaj, kur Nostradamus hapi një klinikë në qytetin francez të Agen në 1529, pasi ishte kthyer në universitet për të plotësuar studimet e tij mjekësore, të gjithë menduan se ai sapo kishte nisur një karrierë të gjatë dhe brilante mjekësore.
Por nuk qe e thënë të ndodhte kështu sepse, shumë shpejt, Nostradamus e braktisi praktikën mjekësore, ndoshta për shkak të vdekjes së papritur të gruas dhe dy fëmijëve të tij, vdekje për të cilat Nostradamus dënonte veten sepse besonte se nuk u kishte kushtuar shumë vëmendje.
Ai brodhi nëpër Evropë për dhjetë vjet duke shkuar nga njëri qytet në tjetrin. Për të mbajtur veten, merrej nga pak me mjekësi, ndonëse preferonte ta kalonte pjesën më të madhe të kohës me astrologë dhe filozofë.
Në 1555, Nostradamus shkroi librin e tij të famshëm të profecive të quajtur "Shekujt" ku ai përshkruan profecitë e tij në formën e citimeve me rimë. Në këto profeci, ai përdori shumë anagrama, alegorira, kalambura, fraza me kuptime sekrete dhe zhargon shkencor për të fshehur kuptimet e profecive. Pse e bëri këtë, akoma nuk është e qartë, por shumë besojnë se arsyeja ishte të mbronte veten nga autoritetet kishtare të atyre viteve.
Profecitë e vërtetuara të Nostradamusit
1. Gjatë bredhjeve të tij nëpër Europë, Nostradamus takoi në Itali një prift të ri franciskan me emrin Feliçe Përetti. Për habinë e kalimtarëve dhe të vet priftit, Nostradamus u gjunjëzua papritur përpara tij duke i thënë, "Hirësia Juaj" duke shtuar se ky prift i ri do të bëhej Papë. Asnjëri nuk e besoi, por prifti i ri u bë Papë (Papa Sikstus V) në 1585 - 50 vjet pas bërjes së parashikimit dhe 19 vjet pasi Nostradamusi vet kishte vdekur.
2. Nostradamus ka parashikuar me emër lindjen dhe bërjen të famshëm të Lui Pastër, kimist dhe bakteriologjist francez me famë (1822-1895). Ky parashikim është bërë 200 vjet më parë se të lindte Lui Pastër.
3. Nostradamus ka parashikuar me saktësi lindjen e prindërve të Hitlerit, hipjen e Hitlerit në fuqi, rënien e tij dhe pasigurinë lidhur me fatin e tij. Nostradamus ia thoshte emrin Hister.
4. Ka parashikuar me saktësi zjarrin e madh që i ra Londrës në 1666 dhe faktin që do të digjeshin shumë kisha. Gjeti edhe ngjarjen edhe datën me saktësi.
5. Parashikimi i Nostradamusit se mbreti Henri II i Francës do të dëmtohej padashje në sy dhe në një pjesë të trupit njëkohësisht dhe se ai do të vdiste më vonë për shkak të plagëve doli i vërtetë në 1559. Atë vit, mbreti i ri francez u plagos aksidentalisht në sy dhe në fyt, plagë nga të cilat ai vdiq më vonë.
6. Nostradamus parashikoi me saktësi lindjen e Napoleonit dhe hipjen e tij në fuqi në Francë. Ai parashikoi gjithashtu pamëshirëshmërinë e tij si politikan, ngjadhnjimet e tij ushtarake dhe frikën që do t'u shtinte ai Italisë, Spanjës, Anglisë dhe gjithë Evropës, internimin e tij, arratisjen dhe mposhtjen e tij në betejën e Vaterlosë (1815). Ai parashikoi gjithashtu vdekjen e Napoleonit në ishullin e Shën Helenës dhe madje edhe faktin se do t'i mbante flokët të prera shkurt. Profeti i madh përmendi dhe emrin e tij, Napoleon.
7. Profeti i madh parashikoi abdikimin, në 1936, të mbretit Eduard VIII të Britanisë për t'u martuar me gruan që dashuronte dhe hipjen pa dëshirë në fron të vëllait të tij që u bë mbreti Xhorxh VI.
8. Nostradamus parashikoi me emër diktatorin spanjoll Franko si edhe refuzimin që do t'i bënte ai në 1941, në një mbledhje të anëtarëve të boshtit, për t'i dhënë Gjermanisë dalje në Rivierë nëpërmjet Spanjës.
9. Nostradamus parashikoi madje edhe vdekjen e tij. Kur një natë më 1 korrik 1566, një nxënës i tij, i quajtur Shavinjy, i tha natën e mirë, Nostradamus iu përgjigj me emfazë, "Nesër, kur të lindë dielli, unë nuk do të jem këtu". Të nesërmen në mëngjes ai u gjet i vdekur. Ai u varros vertikalisht sepse ai nuk donte që dikush të ecte mbi trupin e tij. Pas 134 vjetësh, varri i tij në kishën e Shën Marthës në Salon, u hap për t'u varrosur në një vend tjetër. Punëtorët gjetën së bashku me kockat edhe një pllakë metalike ku ishte gërvishtur data "1700", pikërisht viti që atij i hapën varrin. Ai e kishte parashikuar edhe këtë gjë.